மேற்கிந்திய தீவுகளை 37 ஓட்டங்களால் வீழ்த்திய இலங்கை – ஷானக, மிஷார, சமீரா அசத்தல்

மேற்கிந்திய தீவுகளுக்கு எதிராக நடைபெற்ற இரண்டாவது இருபது ஓவர் சர்வதேச கிரிக்கெட் போட்டியில், துடுப்பாட்டம் மற்றும் பந்துவீச்சு என இரு துறைகளிலும் சிறப்பான ஆட்டத்தை வெளிப்படுத்திய இலங்கை அணி 37 ஓட்டங்களால் அபார வெற்றியைப் பதிவு செய்துள்ளது.

போட்டியில் நாணய சுழற்சியில் வெற்றி பெற்ற மேற்கிந்திய தீவுகள் அணி முதலில் பந்துவீச்சைத் தேர்வு செய்தது. அதன்படி முதலில் துடுப்பாடிய இலங்கை அணி, நிர்ணயிக்கப்பட்ட 20 ஓவர்களில் 6 விக்கெட்டுகளை இழந்து 194 ஓட்டங்களை குவித்தது.

இலங்கை அணியின் தொடக்க வீரர்கள் குறைந்த ஓட்டங்களில் ஆட்டமிழந்த போதிலும், நடுத்தர வரிசையில் களமிறங்கிய கமில் மிஷார பொறுப்பான ஆட்டத்தை வெளிப்படுத்தி 40 பந்துகளில் 61 ஓட்டங்களைப் பெற்றார். அவருக்கு சிறந்த ஆதரவு வழங்கிய முன்னாள் தலைவர் தசுன் ஷானக, வெறும் 24 பந்துகளில் 58 ஓட்டங்களை விளாசி அணியின் ஓட்ட எண்ணிக்கையை வேகமாக உயர்த்தினார்.

 

 

இந்த இருவரும் இணைந்து 5வது விக்கெட்டுக்காக 100 ஓட்டங்களை பகிர்ந்துகொண்டது இலங்கை அணியின் இன்னிங்ஸின் திருப்புமுனையாக அமைந்தது. மேற்கிந்திய தீவுகள் அணியின் பந்துவீச்சில் ஷமார் ஜோசப் 3 விக்கெட்டுகளை கைப்பற்றினார்.

195 ஓட்டங்கள் என்ற சவாலான வெற்றி இலக்குடன் பதிலுக்கு துடுப்பாடிய மேற்கிந்திய தீவுகள் அணி, ஆரம்பம் முதலே இலங்கை பந்துவீச்சாளர்களின் கட்டுப்பாட்டுக்குள் சிக்கியது. தொடர்ச்சியாக விக்கெட்டுகளை இழந்த அந்த அணி 18.1 ஓவர்களில் 157 ஓட்டங்களுக்கு சகல விக்கெட்டுகளையும் இழந்து தோல்வியைத் தழுவியது.

 

 

இலங்கை அணியின் வெற்றியில் முக்கிய பங்காற்றிய துஷ்மந்த சமீரா, 3.1 ஓவர்களில் வெறும் 9 ஓட்டங்களை மட்டுமே விட்டுக்கொடுத்து 3 விக்கெட்டுகளை வீழ்த்தி ஆட்டநாயகன் தரத்தில் பந்துவீச்சை வெளிப்படுத்தினார். அதேவேளை, வனிந்து ஹசரங்க 3 விக்கெட்டுகளையும், துனித் வெல்லாலகே 2 விக்கெட்டுகளையும் கைப்பற்றி மேற்கிந்திய தீவுகள் அணியின் துடுப்பாட்டத்தை சிதறடித்தனர்.

இந்த வெற்றியின் மூலம் இலங்கை அணி தொடரில் தனது ஆதிக்கத்தை மேலும் வலுப்படுத்தியுள்ளதுடன், அடுத்த போட்டிக்கான நம்பிக்கையையும் அதிகரித்துள்ளது.